A ESAD de Galicia convértese, os días 21 e 22 de marzo, no epicentro da educación teatral no Estado Español, ao acoller o décimo encontro das quince Escolas Superiores de Arte Dramática (ESAD). Esta xuntanza, que se celebra dúas veces ao ano, reunirá a docentes, equipos directivos e, por vez primeira, a alumnado das escolas, nun espazo de diálogo e colaboración onde se compartirán coñecementos, se deseñarán plans de acción conxunta e se tratarán aspiracións e problemáticas comúns.
O encontro, organizado pola ESAD de Galicia, que neste 2025 celebra o seu XX aniversario, incluirá sesións de traballo tanto presenciais como en liña, co obxectivo de fortalecer os vínculos entre as institucións e avanzar na mellora da formación teatral en todos os niveis educativos. Un dos eixes centrais das reunións será a implantación da Lei de Ensinanzas Artísticas, aprobada o ano pasado, que modificará en poucos anos a actual estrutura académica das ensinanzas artísticas superiores, así como a súa oferta educativa. Tamén se abordarán temas clave como a aplicación dos sistemas de calidade nas ESAD, os dereitos culturais, os obxectivos de desenvolvemento sostible e a aprendizaxe-servizo.
Este encontro destaca pola inclusión de alumnado nas sesións de traballo. As mesas de estudantes centrarán a súa atención na xeración de propostas que melloren o apoio, o benestar e a convivencia nos centros. Esta orientación das charlas reflicte o interese das comunidades escolares en integrar a perspectiva do alumnado no proceso de transformación e mellora dos centros, primando o seu benestar emocional, físico e mental.
