Convocatoria ordinaria

As persoas solicitantes deberán achegar durante o prazo de inscrición, ademais da solicitude, a seguinte documentación:

1) Copia do DNI, NIE ou pasaporte da persoa solicitante.

2) Copia do DNI, NIE ou pasaporte da persoa representante, só no caso de actuar por medio de representante. En tal caso, é imprescindible a acreditación da representación fidedigna por calquera medio válido en dereito.

3) Xustificante do pagamento dos prezos públicos segundo o Decreto 89/2013, do 13 de xuño (DOG do 17 de xuño), segundo un destes modelos oficiais, xunto cos certificados de exención ou redución correspondente, se é o caso:

Modelo E (autocopiativo en papel facilitado nas secretarías dos centros).

Modelo AI.

Modelos 730 e 731, xerados electronicamente na Oficina Virtual Tributaria da Axencia Tributaria de Galicia (https://ovt.atriga.gal).

GUÍA PARA O PAGAMENTO DAS TAXAS en OVT.ATRIGA.GAL

1. Acceder á web da Oficina Virtural Tributaria na dirección ovt.atriga.gal

2. Dentro da opción Pago de taxas e prezos, premer no botón Iniciar taxa e seleccionar a opción de Acceso libre.

3. Premer no botón Iniciar taxa.

4. Cubrir cos seguintes datos:

Taxa: 352500 – ENSINANZAS REGRADAS DE ARTE DRAMÁTICA

Consellería: 07 – EDUCACIÓN, CIENCIA, UNIVERSIDADES E FORMACIÓN PROFESIONAL

Servizo: 03 – ENSINO MEDIO

Delagación:v41 – VIGO

Obxecto: PROBAS DE ACCESO Á ESAD DE GALICIA

A ingresar: 64,00

5. Premer Continuar.

6. Cubrir os datos identificativos e premer Continuar.

7. Aparecerán entón dúas opcións de pago: Pago telemático ou Descargar modelo presencial para imprimir e efectuar o pago nunha entidade financeira colaboradora ou mediante transferencia bancaria.

8. Unha vez feito o trámite, obterase o xustificante do pago.

4) Documentación xustificativa do requisito de titulación. As persoas solicitantes deberán presentar, polo menos, un dos seguintes documentos:

Título de Bacharel.

Título de ensinanzas artísticas superiores.

Título universitario.

Título de técnico superior.

Titulo declarado equivalente ou homologado aos anteriores títulos. No caso de titulacións obtidas no estranxeiro, deberá achegarse copia da credencial de homologación ao título correspondente do sistema educativo español ou, de ser o caso, do volante de inscrición condicional expedido polo órgano competente.

Certificación de ter superado a proba de acceso á Universidade para maiores de 25 anos.

Certificación académica do bacharelato, con indicación de materias pendentes.

5) Documentación específica segundo corresponda.

Para resolver calquera dúbida en relación coa inscrición, as persoas que así o desexen poderán poñerse en contacto coa administación da escola a través do número de teléfono 886 12 19 70 ou enviar un correo electrónico a esad.galicia@edu.xunta.gal

Unha vez cargada a documentación preceptiva e completada a solicitude na aplicación informática «EAS», deberase finalizar e xerar o documento de solicitude de inscrición. Esta solicitude, debidamente asinada, presentarase na Administración da ESAD de Galicia dentro do prazo establecido.

Dado que a documentación requirida para o procedemento se tivo que incorporar electronicamente en «EAS» no momento de cubrir a solicitude, non será necesario volver a meala no centro, sen prexuízo das actuacións de comprobación e validación que correspondan.

A solicitude entenderase presentada na data que figure como entrada no Rexistro da ESAD de Galicia. No caso de persoas menores de idade, a solicitude deberá ser xerada e presentada polas persoas que exerzan a representación legal, que deberán mear esta condición por calquera medio válido en dereito, conforme a normativa reguladora do procedemento administrativo común.

As persoas solicitantes que non teñan nacionalidade española e non dispoñan de documento nacional de identidade (DNI) ou número de identidade estranxeiro (NIE) poderán acceder ao formulario de inscrición directamente nas secretarías dos centros de inscrición.

As solicitudes de inscrición debidamente formalizadas terán carácter único e vinculante para o curso académico 2026/27, sen posibilidade de modificación unha vez finalizado o prazo de inscrición establecido nesta resolución.

Considerarase válida unicamente a última solicitude formalizada para a ensinanza artística superior e proba específica correspondente, dentro do prazo de inscrición. Quedarán sen efecto as anteriormente presentadas.

Para as ensinanzas artísticas superiores de Arte Dramática, o prazo de inscrición finalizará o 16 de xuño de 2026, incluído.

Concluído o prazo de presentación de solicitudes de inscrición, a Dirección Xeral de Formación Profesional, a través do Servizo de Ensinanzas de Réxime Especial e Aprendizaxe Permanente, publicará na aplicación informática EAS a relación provisional de persoas inscritas admitidas e excluídas. Tamén se publicará no taboleiro de anuncios da ESAD de Galicia.

As persoas interesadas disporán de dous (2) días de prazo de reclamación desde o día seguinte ao da publicación da listaxe provisional para emendar as causas que motivaron a súa exclusión. Esta reclamación presentarase na Secretaría da ESADg e irá dirixida á Dirección Xeral de Formación Profesional.

As alegacións entenderanse resoltas e notificadas para todos os efectos coa publicación da listaxe definitiva de persoas admitidas e excluídas, tanto na aplicación EAS como no taboleiro de anuncios da ESAD de Galicia.

DATA PROBAS: Luns, 7 de setembro de 2026
—
Todos os soportes e materiais necesarios para o desenvolvemento destas probas deberán ser achegados por cada aspirante. 

9:00 Recepción das aspirantes, condución ao espazo de realización das probas, información sobre os exercicios e comprobación da identidade das aspirantes. É necesario presentar o D.N.I. ou no seu defecto calquera documento de identificación persoal.

9:15 EXERCICIO 1. Debuxo ao natural a cor (40% da cualificación final).
A partir dunha proposta comunicada polo tribunal ao inicio da proba (unha imaxe, unha peza musical, un poema, etc.), as aspirantes deberán realizar un debuxo libre ao natural a cor. A elección do soporte será libre (bidimensional ou tridimensional, papel, cartón, madeira, etc.) pero o tamaño mínimo será o formato A3. A técnica a empregar tamén será libre (acuarela, gouache, acrílico, lapis de cores, pasteis, collage, frottage, grattage, rotuladores, etc.).

11:15 DESCANSO

11:45 EXERCICIO 2. Deseño de escenografía (40% da cualificación final).
A partir dun fragmento dun texto dramático facilitado polo tribunal ao inicio da proba, as aspirantes deberán realizar unha proposta de deseño do espazo escénico e das personaxes. A elección do soporte será libre (bidimensional ou tridimensional) pero o tamaño mínimo será o formato A3. A técnica a empregar tamén será libre (construción, ensamblaxe, collage, pintura, etc.).

13:45 ENTREVISTA PERSOAL (20% da cualificación final).
Cunha duración non superior a vinte minutos, terá como finalidade coñecer as experiencias previas dos aspirantes no ámbito das artes plásticas e no campo escénico, así como os seus intereses e expectativas en relación cos estudos. Valorarase a achega por parte das aspirantes dun cartafol con traballos plásticos e/ou experiencias relacionadas co feito teatral ou artístico que considere oportunos aportar ao tribunal.

DATAS DAS PROBAS: 6 ao 8 de xullo de 2026

As persoas aspirantes ás probas de acceso á especialidade de Interpretación dividiranse en catro grupos. Aquí están os horarios de realización das probas para cada grupo.

NORMAS DE REALIZACIÓN DAS PROBAS

• Todas as persoas aspirantes deberán presentar o seu DNI ou NIE en vigor para poder seren identificadas e acceder ás probas.

• Todo o alumnado aspirante acudirá con roupa deportiva cómoda (preferiblemente de cores escuras) e calzado deportivo apto para correr sobre asfalto. Levará o pelo recollido, sen xoias, piercings nin reloxos.

• Débese ter en conta que, para a realización de determinados exercicios, pode ser necesario descalzarse.

• Aconséllase traer auga nun envase que leve o nome da persoa aspirante.

• Todas as persoas aspirantes deberán ser puntuais nas probas en grupo e na entrevista.

ESTRUTURA DAS PROBAS

As probas de acceso á especialidade de Interpretación desenvolveranse durante varios días e presentan a estrutura que se indica a continuación:

EXERCICIO 1. Corpo (30 % da cualificación final)

Realizaranse diversas propostas prácticas de traballo orientadas a analizar as aptitudes corporais, a creatividade no movemento e o nivel de interacción co grupo de cada unha das persoas aspirantes.

EXERCICIO 2. Voz (30 % da cualificación final)

Realizaranse diversas propostas prácticas de traballo orientadas a analizar a conciencia e o uso da respiración, a calidade vocal e a comprensión e expresión lectoras. Será necesario traer ben memorizado o texto proposto. Canto: afinación, emisión, concentración, oído interno e memoria.

• Texto para memorizar

EXERCICIO 3. Interpretación (30 % da cualificación final)

O tribunal proporá diversos traballos de improvisación, nos que se observará a capacidade de escoita, a integración dos estímulos corporais e vocais de cara á interpretación e o uso do espazo, do tempo e do ritmo dramáticos.

O segundo día todas as persoas aspirantes deberán presentar:

1. Unha PROPOSTA ESCÉNICA a partir dun dos 3 textos propostos (ligazón aos textos). A proposta, ademais de contemplar a interpretación do texto, poderá incluír o seu uso de maneira non convencional. A persoa aspirante deberá traer todo o necesario para realizar a súa proposta.

2. Unha PROPOSTA LIBRE na que amose diversas destrezas (danza, música, interpretación, malabares ou calquera outra expresión que considere). A escola conta con equipo de música, cadeiras e piano para as propostas que o precisen. As cancións deberán entregarse nunha memoria USB para a súa reprodución. (Duración máxima: 2 minutos).

ENTREVISTA PERSOAL (10 % da cualificación final)

Terá como finalidade analizar as destrezas comunicativas das persoas aspirantes, valorar a súa capacidade de resposta ás preguntas que se lles formulen e coñecer os seus intereses e expectativas.

Rúbrica Probas Acceso Interpretación