PROBAS DE ACCESO

Procedemento

Publicación das probas de acceso 2026

O procedemento de acceso e admisión aos estudos superiores de Arte Dramática publicarase no Diario Oficial de Galicia mediante unha Resolución emitida pola Dirección Xeral de Formación Profesional. Tendo en conta os períodos de publicación dos pasados anos, estímase que a Resolución darase a coñecer no mes de abril de 2026. Nesa altura convocaranse probas de acceso para as tres especialidades que a ESAD de Galicia ten implantadas:

    • Dirección escénica e dramaturxia
    • Escenografía
    • Interpretación

Toda a información referente ao procedemento de acceso ás ensinanzas artísticas superiores estará dispoñible entón no portal educativo da Consellería de Educación, Ciencia, Universidades e Formación Profesional (https://www.edu.xunta.gal/portal/node/), así como na páxina de inicio da aplicación EAS (https://www.edu.xunta.gal/eas/).

En canto se publique a convocatoria deste ano 2026, esta páxina actualizarase coa información definitiva sobre as probas de acceso.

Requisitos de acceso

De acordo co establecido no artigo 12.1 do Real decreto 1614/2009, do 26 de outubro, o acceso ás ensinanzas oficiais conducentes aos títulos de grao en ensinanzas artísticas superiores nos diferentes ámbitos requirirá posuír algún dos seguintes requisitos:

  • Título de Bacharelato.
  • Certificación académica do bacharelato con indicación de materias pendentes. (poderá realizar a proba específica, pero deberá estar en posesión do título para optar á asignación de praza)
  • Certificación de ter superado a proba de acceso á Universidade para maiores de 25 anos.
  • Título de ensinanzas artísticas superiores.
  • Título universitario.
  • Título de técnico superior.

A título informativo, lémbrase que cada ano se convocan probas para a obtención do título de bacharel para maiores de vinte anos. A Resolución que regula este procedemento adoita publicarse no Diario Oficial de Galicia nos meses de xaneiro ou febreiro (velaquí a convocatoria de 2025).

Procedemento de acceso e admisión

Velaquí a estrutura que, aínda sen datas definitivas, terá o procedemento de acceso e admisión ás ensinanzas da ESAD de Galicia neste ano 2026.

1) FASE DE INSCRICIÓN

Comprende o período de envío da documentación requirida ao correo da escola ( esad.galicia@edu.xunta.gal ). Ese prazo de inscrición comezará ao día seguinte da publicación, alá por abril de 2026, da normativa das probas no Diario Oficial de Galicia e rematará no mes de xuño de 2026. Entón:

  • Publicarase unha listaxe provisional de persoas admitidas e excluídas.
  • Contra esa listaxe abrirase un período de reclamación.
  • Publicarase finalmente unha listaxe definitiva de persoas admitidas e excluídas.

2) FASE DE PROBAS

Realizaranse probas específicas a finais de xuño ou principios de xullo para cada unha das tres especialidades que se imparten a ESAD de Galicia (Dirección escénica e dramaturxia, Escenografía e Interpretación). Logo de se realizaren:

  • Publicarase a listaxe provisional de cualificacións da proba específica.
  • Habilitarase un período de reclamación contra a listaxe provisional.
  • Publicarase, finalmente, a listaxe definitiva de cualificacións.

3) FASE DE ADXUDICACIÓN E MATRÍCULA

Ao rematar a fase anterior, publicarase a listaxe de adxudicacións de prazas e habilitaranse, a finais de xullo, unhas datas para a formalización de matrícula para o curso 2026-2027.

GUÍA PARA A INSCRICIÓN

Como referencia, velaquí a Guía do curso pasado para a inscrición nas probas de acceso a todas as ensinanzas artísticas superiores de Galicia, documento editado pola Dirección Xeral de Formación Profesional.

Información adicional

EN BLANCO

 

Documentación requirida na inscrición

Ata que en marzo/abril de 2026 non se publique a Resolución que regule o proceso de acceso e admisión, aínda non se pode asegurar a documentación que vai ser requirida na inscrición ás probas de acceso deste ano. Non obstante, se o procedemento é similar ao do ano pasado, as persoas interesadas en inscribirse nas probas de acceso terán que enviar, no período de inscrición, un correo electrónico ao enderezo esad.galicia@edu.xunta.gal coa seguinte documentación:

1) Copia de DNI, NIE ou pasaporte.

2) Solicitude de inscrición nas probas de acceso (Solicitude Probas de Acceso ESAD)

3) Xustificante do aboamento dos prezos públicos segundo o Decreto 89/2013, do 13 de xuño (DOG do 17 de xuño), segundo un destes modelos oficiais, xunto cos certificados de exención ou redución correspondente, se é o caso:

Modelo AI. (Modelos de taxas e precios)

Modelos 730 e 731, xerados electronicamente no portal da internet da Axencia Tributaria de Galicia (https://ovt.atriga.gal).

CÓDIGOS PAGO TAXAS
Consellería: 07
Delegación: 41
Servizo: 03
Taxa: 352500
Concepto: Probas acceso ESAD de Galicia
Cantidade: 64 € (normal) | 32 € (familia numerosa categoría xeral)

O pagamento dos prezos públicos correspondentes ás probas de acceso non poderá ser fraccionado.

4) Documentación académica de acceso ás probas, que poderá ser algunha das seguintes:

Título de Bacharelato

Certificación de ter superado a proba de acceso á Universidade para maiores de 25 anos

Título de ensinanzas artísticas superiores

Título universitario

Título de técnico superior

5) Documento acreditativo do grao de discapacidade e solicitude de adaptación dos medios e condicións de realización da proba de acceso que corresponda, de ser o caso.

6) Documento acreditativo da condición de deportista galego de alto nivel e/ou rendemento, de ser o caso.

Para resolver calquera dúbida en relación coa inscrición, as persoas que así o desexen poderán poñerse en contacto coa administación da escola a través do número de teléfono 886 12 19 70 ou enviar un correo electrónico a esad.galicia@edu.xunta.gal

Admisión

Para o curso 2026-2027, a ESAD de Galicia ofertará o seguinte número de prazas no primeiro curso das tres especialidades que ten implantadas:

  • Dirección escénica e dramaturxia: 12 prazas
  • Escenografía: 12 prazas
  • Interpretación: 28 prazas

    De acordo co establecido na artigo 8 da Orde de 21 de novembro de 20218 reservase un 10% das prazas para aqueles aspirantes ao acceso ás ensinanzas superiores de Arte Dramática que presente a documentación que acredite oficialmente a súa discapacidade, cun grao igual ou superior ao 33%, e unha solicitude de adaptación do medios de realización da proba que corresponda en condición de igualdade co resto de aspirantes.

    Conforme o establecido no artigo 9 da Orde do 21 de novembro de 2016, reservarase adicionalmente as prazas necesarias en cada especialidade impartida para o acceso dos/das aspirantes que acrediten a súa condición de deportista galego de alto nivel e/ou rendemento que reúna os requisitos académicos establecidos.

    A asignación de prazas realízase en función dos resultados da avaliación da proba, que se expresarán en termos numéricos nunha escala de 1 a 10, con dous decimais, e sempre en función das vacantes dispoñibles, considerando a proba superada para as cualificacións iguais ou superiores a 5. Unha vez finalizado todo o proceso, cumpridos os períodos de revisión e reclamacións, faise pública a acta coas cualificacións definitivas das probas e coa asignación de prazas, no portal educativo da Consellería de Educación, Ciencia, Universidades e Formación Profesional.

    A admisión para cursar os estudos dependerá do número de vacantes dispoñibles, que se adxudicarán en función da puntuación obtida, comezando coa maior puntuación e continuando en orde decrecente. O alumnado que supere as probas pero non obteña praza será incluído na quenda de agarda. De non cubrirse todas as prazas dunha especialidade na convocatoria ordinaria, poderá realizarse unha convocatoria extraordinaria no mes de setembro.

    Tribunais

    De acordo co establecido no artigo 7.3 da Orde do 21 de novembro de 2016, para a organización, a realización, a avaliación e a cualificación das probas específicas de acceso, constituirase un tribunal por especialidade. Tribunais encargados da redacción, realización e cualificación da proba específica de acceso aos estudos superiores de Arte Dramática.